Më 23 dhe 24 tetor 2026, qyteti ynë pret edicionin zero të festivalit ndërkombëtar të teatrit “La Rremë”, një nismë e re që vjen për të krijuar hapësirë për bashkëpunim mes krijuesve vendorë dhe atyre ndërkombëtarë.
Festivali mban emrin e Muharrem Qenës – i njohur si “La Rremë” – një prej figurave më të rëndësishme të teatrit kosovar, dhe organizohet në bashkëpunim me Teatrin Kombëtar të Kosovës.
Hapja zyrtare bëhet më 23 tetor, në orën 19:00, në Sallën e Kuqe të Pallatit të Rinisë. Menjëherë pas saj, në orën 19:30, vjen shfaqja “Taverna Mirësia – Mario, Bella, Anastasia” e regjisorit Mario Banushi, fitues i Luanit të Argjendtë për Teatër në Bienalen e Venecias 2026. Shfaqja zgjat rreth 70 minuta, është pa dialog dhe trajton kujtesën familjare e përjetimin e humbjes. Ajo do të jepet edhe më 24 tetor, në të njëjtën orë.
Programi i ditës së dytë përfshin masterklasën “Klasikët në skenën bashkëkohore” me regjisorin Dino Mustafić, nga ora 10:00 deri në 16:00 në Teatrin Kombëtar, si dhe një diskutim mbi teatrin bashkëkohor në Qendrën Barabar. Festivali mbyllet mbrëmjen e 24 tetorit, në orën 21:30, me koncertin e Ibadete Ramadanit dhe grupit të saj te Menza Ramiz Sadiku.