FemArt 14 nis të premten në Prishtinë me gjashtë ditë program ndërkombëtar

Për gjashtë ditë, ky festival sjell teatër, film, performancë, muzikë, ekspozita, promovime librash dhe diskutime në disa hapësira kulturore të kryeqytetit.

Hapja bëhet të premten në Teatrin Dodona, ku në orën 20:00 prezantohet “CABARET biZ’arT”, performancë cirku nga Franca. Programi vazhdon më 26 shtator me punëtori dhe diskutime gjatë ditës, ndërsa në mbrëmje Dodona pret shfaqjen sllovene “The Art of Living: The Act of Killing”.

Edicioni i sivjetmë sjell në Prishtinë produksione dhe artistë nga Franca, Belgjika, Sllovenia, Luksemburgu, Qiproja, Italia, Shqipëria dhe Kosova. Aktivitetet shpërndahen mes Teatrit Dodona, Kino ARMATA, Bibliotekës Kombëtare, Fakultetit të Arteve dhe hapësirave të tjera të qytetit.

Një prej pikave të programit është edhe hapja e Stacionit Kulturor të Prishtinës, e paraparë për 28 shtator në orën 20:00. Mbrëmja vazhdon aty me teatër vallëzimi nga Luksemburgu dhe koncertin e grupit italian LEDA.

Programi i FemArt 14 mbyllet më 30 shtator, pas gjashtë ditësh aktivitetesh kulturore në Prishtinë.